UK Suddi
The news is by your side.

ವಿಯೆಟ್ನಾಂ ಜನರಿಗೆ ಛತ್ರಪತಿ ಶಿವಾಜಿ ಹೀರೋ

ಛತ್ರಪತಿ ಶಿವಾಜಿ ಔರಂಗಜೇಬ್​ನಂಥ ಶಕ್ತಿಶಾಲಿ ಸಾಮ್ರಾಟನನ್ನು ಸೋಲಿಸುವಲ್ಲಿ ಸಫಲನಾಗಿದ್ದು ಹೇಗೆ ಎಂಬ ನಿಟ್ಟಿನಲ್ಲಿ ಭಾರತೀಯರು ಚಿಂತನೆ ನಡೆಸದೇ ಇರಬಹುದು. ಆದರೆ, ವಿಯೆಟ್ನಾಂ ಮಾತ್ರ ನಮ್ಮ ಈ ಇತಿಹಾಸ ವೀರನ ಸಾಹಸಗಳ ಅಧ್ಯಯನ ನಡೆಸಿ ರೂಪಿಸಿದ ರಣನೀತಿಗೆ ಅಮೆರಿಕದಂಥ ಬಲಾಢ್ಯ ರಾಷ್ಟ್ರವೇ ಸೋತು ಶರಣಾಗಿತ್ತು.

ಅನಾದಿ ಕಾಲದಲ್ಲಿ ವಿವಿಧ ಕ್ಷೇತ್ರಗಳಲ್ಲಿ ತಾನು ಸಾಧಿಸಿದ ಸಾಧನೆಯನ್ನು ಅರ್ಥ ಮಾಡಿಕೊಳ್ಳುವಲ್ಲಿ ಹಾಗೂ ಜಗತ್ತಿಗೆ ಅದನ್ನು ಅರ್ಥೈಸುವಲ್ಲಿ ಭಾರತ ಅಸಮರ್ಥವಾಗಿದೆ. ಆದರೆ, ವಿದೇಶಗಳು ಪ್ರಾಚೀನ ಭಾರತದ ಅನುಭವವನ್ನು ಬಳಸಿಕೊಂಡು ಏನಾದರೂ ಅದ್ಭುತವನ್ನು ಸಾಧಿಸುವಲ್ಲಿ ಸಫಲವಾದಾಗ ನಮ್ಮ ನಾಯಕರು ಹಾಗೂ ಬುದ್ಧಿಜೀವಿಗಳು ತಲೆಕೆಡಿಸಿಕೊಳ್ಳುತ್ತಾರೆ ಅಷ್ಟೆ. ನಮ್ಮ ಪೂರ್ವಜರು ಶೋಧಿಸಿದ ಅದ್ಭುತ ಚಿಂತನೆ, ಸಿದ್ಧಾಂತ ಹಾಗೂ ಸಾಮಗ್ರಿಗಳನ್ನು ಬಳಸಿಕೊಂಡು ವಿಶಿಷ್ಟವಾದುದನ್ನು ಸಾಧಿಸಲು ಸಾಧ್ಯ ಎಂಬ ತಿಳಿವು ಅನೇಕ ಸಂದರ್ಭಗಳಲ್ಲಿ ನಮಗೆ ಮೂಡುವುದೇ ಇಲ್ಲ. ಶೂನ್ಯದ ಶೋಧನೆಯೇ ಆಗಲಿ ಅಥವಾ ಚರಕದ ಅನ್ವೇಷಣೆಯೇ ಆಗಲಿ ಇಲ್ಲವೆ ವೈದ್ಯಕೀಯ ಕ್ಷೇತ್ರಕ್ಕೆ ಚರಕ, ಶುಶ್ರೂತ ಅಥವಾ ಧನ್ವಂತರಿ ನೀಡಿದ ಕೊಡುಗೆಯೇ ಇರಬಹುದು… ಇವೆಲ್ಲ ಭಾರತದ ಹಿರಿಮೆಯನ್ನು ಸಾರುವ ಸಾಧನೆಗಳು. ವೈದ್ಯಕೀಯ ಅಥವಾ ಇನ್ಯಾವುದೇ ಕ್ಷೇತ್ರ ಇರಲಿ, ಅದಕ್ಕೆ ಭಾರತ ನೀಡಿದ ಕೊಡುಗೆ ಅದರ ಪಾಂಡಿತ್ಯಕ್ಕೆ ಹಿಡಿದ ಕೈಗನ್ನಡಿ. ಇನ್ನು ಯುದ್ಧಕಲೆಗೆ ಭಾರತ ನೀಡಿರುವ ಕೊಡುಗೆ ಬಗ್ಗೆ ಕೂಡ ವಿದೇಶಗಳಲ್ಲಿ ನಿರಂತರ ಚರ್ಚೆಗಳು ನಡೆಯುತ್ತಲೇ ಇರುತ್ತವೆ. ಆದರೆ, ಭಾರತೀಯರು ಮಾತ್ರ ಹಿತ್ತಲ ಗಿಡ ಮದ್ದಲ್ಲ ಎಂಬ ಮನೋಭಾವ ಹೊಂದಿರುವುದು ವಿಪರ್ಯಾಸವೇ ಸರಿ.

ಛತ್ರಪತಿ ಶಿವಾಜಿ ಮಹಾರಾಜ್ ಔರಂಗಜೇಬ್​ನಂಥ ಶಕ್ತಿಶಾಲಿ ಸಾಮ್ರಾಟನನ್ನು ಸೋಲಿಸುವಲ್ಲಿ ಸಫಲನಾಗಿದ್ದು ಹೇಗೆ ಎಂಬ ನಿಟ್ಟಿನಲ್ಲಿ ಭಾರತೀಯರು ಚಿಂತನೆ ನಡೆಸದೇ ಇರಬಹುದು. ಆದರೆ, ಭಾರತದಿಂದ ಸ್ವಲ್ಪವೇ ದೂರದಲ್ಲಿರುವ ವಿಯೆಟ್ನಾಂ ಮಾತ್ರ ನಮ್ಮ ಈ ಇತಿಹಾಸ ವೀರನ ಸಾಹಸಗಳ ಅಧ್ಯಯನ ನಡೆಸಿ ರೂಪಿಸಿದ ರಣನೀತಿಗೆ ಅಮೆರಿಕದಂಥ ಬಲಾಢ್ಯ ರಾಷ್ಟ್ರವೇ ಸೋತು ಶರಣಾಗಿತ್ತು. ಇನ್ನು ಈ ರಹಸ್ಯದ ಕುರಿತು ಭಾರತೀಯ ಮೂಲದವರು ವಿಶ್ಲೇಷಣೆ ನಡೆಸಿದರೆ ಅದನ್ನು ಅವರೇ ಸೃಷ್ಟಿಸಿದ ಕಟ್ಟುಕತೆ ಎಂದು ಹೇಳಿ ನಿರಾಕರಿಸಿ ಬಿಡಬಹುದಿತ್ತು. ಆದರೆ, ಈ ರಹಸ್ಯವನ್ನು ವಿಯೆಟ್ನಾಂನ ಪ್ರಧಾನಮಂತ್ರಿ ಹಾಗೂ ವಿದೇಶಿ ಮಂತ್ರಿಗಳೇ ಜಗತ್ತಿನ ಮುಂದೆ ಬಿಚ್ಚಿಟ್ಟಿದ್ದಾರೆ. ಈ ಘಟನೆ ನಡೆದು ದೀರ್ಘಕಾಲವೇ ಆಗಿರಬಹುದು, ಆದರೆ ಅವಕಾಶ ಸಿಕ್ಕಾಗ ವಿಯೆಟ್ನಾಂ ನಾಯಕರು ಈ ಸತ್ಯವನ್ನು ಜಗತ್ತಿನ ಮುಂದೆ ಸಾದರಪಡಿಸಲು ಹಿಂಜರಿಯಲಿಲ್ಲ. ‘ಭಾರತೀಯ ಇತಿಹಾಸದಲ್ಲಿ ಬರುವ ಮಹಾನ್ ನಾಯಕ ಛತ್ರಪತಿ ಶಿವಾಜಿ ಮಹಾರಾಜ್ ಜೀವಚರಿತ್ರೆಯ ಅಧ್ಯಯನ ನಡೆಸದಿದ್ದರೆ ಅಮೆರಿಕದಂಥ ಬಲಿಷ್ಠ ರಾಷ್ಟ್ರವನ್ನು ಎದುರಿಸುವ ತಾಕತ್ತು ನಮಗೆ ಬರುತ್ತಿರಲಿಲ್ಲ’ ಎಂದು ವಿಯೆಟ್ನಾಂ ನಾಯಕರೇ ಸ್ಪಷ್ಟಪಡಿಸಿದ್ದಾರೆ.

ವಿಯೆಟ್ನಾಂನಲ್ಲಿ ನಡೆದ ಈ ಬೆಳವಣಿಗೆಗಳ ಬಗ್ಗೆ ಭಾರತದ ಬುದ್ಧಿಜೀವಿ ಅಶೋಕ್ ಚೌಗುಲೆ ಬೆಳಕು ಚೆಲ್ಲುವ ಮೂಲಕ ಇಡೀ ದೇಶವನ್ನೇ ಚಕಿತಗೊಳಿಸಿದ್ದಾರೆ. ಇತ್ತೀಚಿನ ದಿನಗಳಲ್ಲಿ ಗೋವಾದಲ್ಲಿ ನೆಲೆಸಿರುವ ಅವರು ತಮ್ಮ ಲೇಖನಗಳ ಮೂಲಕ ಭಾರತೀಯ ಸಾಹಿತ್ಯಕ್ಕೆ ಕೊಡುಗೆ ನೀಡುತ್ತಿದ್ದಾರೆ. ಭಾರತ ಸರ್ಕಾರದ ಜತೆಗೆ ದೇಶದ ಇತರ ಬುದ್ಧಿಜೀವಿಗಳು ಕೂಡ ವಿಯೆಟ್ನಾಂನಲ್ಲಿ ನಡೆದ ಬೆಳವಣಿಗೆಗಳ ಬಗ್ಗೆ ಈಗ ಆಸಕ್ತಿ ತೋರುತ್ತಿದ್ದಾರೆ. ಶಿವಾಜಿ ಮಹಾರಾಜರ ಬಗ್ಗೆ ಮಹಾರಾಷ್ಟ್ರದ ನಾಗರಿಕರು ಅಪಾರ ಗೌರವ ಹೊಂದಿದ್ದಾರೆ. ಶಿವಾಜಿಯ ಶೌರ್ಯ, ಸಾಹಸಗಳ ಬಗ್ಗೆ ಎಷ್ಟು ಹೊಗಳಿದರೂ ಕಡಿಮೆಯೇ ಎಂಬ ಭಾವನೆ ಅವರಲ್ಲಿದೆ. ಆದರೆ, ಬೇರೆ ರಾಜ್ಯಗಳ ಜನ ಅವರ ಬಗ್ಗೆ ತಿಳಿದುಕೊಂಡಿರುವುದು ತುಸು ಕಡಿಮೆಯೇ. ಅಂಥ ನಾಯಕನ ಯುದ್ಧತಂತ್ರವನ್ನು ಅನ್ಯ ರಾಷ್ಟ್ರವೊಂದು ಅಳವಡಿಸಿಕೊಂಡು ಜಯ ಸಾಧಿಸಿರುವುದು ಕಡಿಮೆ ಸಾಧನೆಯೇನಲ್ಲ. ಸರಿಸುಮಾರು ನಾಲ್ಕು ದಶಕಗಳ ಹಿಂದೆ ಸೋಲೊಪ್ಪಿಕೊಳ್ಳುವಂತೆ ಅಮೆರಿಕದ ಮೇಲೆ ವಿಯೆಟ್ನಾಂ ಒತ್ತಡ ಹೇರಿತ್ತು. ಅಷ್ಟೇ ಅಲ್ಲ, ಅಮೆರಿಕದಂಥ ರಾಷ್ಟ್ರ ಯಾವುದೇ ಒಂದು ದೇಶವನ್ನು ಚಿಕ್ಕದು ಅಥವಾ ಬಲಹೀನ ಎಂದು ಭಾವಿಸಿ ಅದನ್ನು ಸೋಲಿಸಬಹುದು ಎಂಬ ಲೆಕ್ಕಾಚಾರ ಹಾಕುವುದು ತಪ್ಪು ಎಂಬ ಪಾಠವನ್ನು ಕೂಡ ಕಲಿಸಿತು. ಅಮೆರಿಕಕ್ಕೆ ವಿಯೆಟ್ನಾಂ ಎದುರಿನ ಸೋಲು ಅತ್ಯಂತ ಕಹಿಘಟನೆಯಾಗಿದ್ದು, ಅದರಿಂದ ಆದ ಅಪಮಾನವನ್ನು ಇಂದಿಗೂ ಮರೆತ್ತಿಲ್ಲ. ಅತ್ಯಾಧುನಿಕ ಶಸ್ತ್ರಾಸ್ತ್ರಗಳ ಜತೆಗೆ ಬಲಾಢ್ಯ ಸೇನಾಪಡೆಯನ್ನು ಹೊಂದಿರುವ ಅಮೆರಿಕ ವಿಯೆಟ್ನಾಂನಂಥ ರಾಷ್ಟ್ರವನ್ನು ಸೋಲಿಸುವುದು ತುಂಬ ಸುಲಭ ಎಂದೇ ಭಾವಿಸಿತ್ತು. ಅಷ್ಟೇ ಅಲ್ಲ, ತನ್ನ ಕುಟಿಲ ರಾಜತಾಂತ್ರಿಕ ನಡೆಗಳ ಮೂಲಕ ವಿಯೆಟ್ನಾಂಗೆ ಬೆದರಿಕೆ ಹಾಕುವ ಪ್ರಯತ್ನವನ್ನೂ ಮಾಡಿತು. ಆದರೆ, ವಿಯೆಟ್ನಾಂಗೆ ತನ್ನ ಸ್ವಾತಂತ್ರ್ಯನ್ನು ಉಳಿಸಿಕೊಳ್ಳುವುದು ಎಲ್ಲಕ್ಕಿಂತ ಮುಖ್ಯವಾಗಿತ್ತು. ಹೀಗಾಗಿ ಅದು ಅಮೆರಿಕದ ಬೆದರಿಕೆಗೆ ಜಗ್ಗಲೂ ಇಲ್ಲ, ಹೆದರಲೂ ಇಲ್ಲ. ಬದಲಿಗೆ ಅಮೆರಿಕ ಈಟಿ ಎಸೆದರೆ ಅದಕ್ಕೆ ಪ್ರತಿಯಾಗಿ ಕಲ್ಲುಗಳನ್ನು ಪ್ರತಿ ಅಸ್ತ್ರವಾಗಿ ಬಳಸುವ ಮೂಲಕ ದಿಟ್ಟ ಹೋರಾಟ ಸಂಘಟಿಸಿತು. ಪರಿಣಾಮ ಹಲವು ರಾಷ್ಟ್ರಗಳ ಹೆಡೆಮುರಿ ಕಟ್ಟಿ, ದೊಡ್ಡಣ್ಣನಂತೆ ವರ್ತಿಸುತ್ತಿದ್ದ ಅತ್ಯಾಧುನಿಕ ಶಸ್ತ್ರಸಜ್ಜಿತ ಅಮೆರಿಕ ಒಂದು ದಿನ ವಿಯೆಟ್ನಾಂ ಎಂಬ ಪುಟ್ಟ ರಾಷ್ಟ್ರದ ಮುಂದೆ ತಲೆಬಾಗಬೇಕಾಯಿತು. ಮುಂದೆಂದೂ ಭವಿಷ್ಯದಲ್ಲಿ ಅಮೆರಿಕ ವಿಯೆಟ್ನಾಂ ಕಡೆಗೆ ಮುಖ ಮಾಡಿ ನೋಡುವ ಸಾಹಸಕ್ಕೆ ಮುಂದಾಗಲಿಲ್ಲ.

ಗೆರಿಲ್ಲಾ ಯುದ್ಧಕ್ಕೆ ಮಣಿದ ಅಮೆರಿಕ: ವಿಯೆಟ್ನಾಂ ನಾಯಕರು ಈ ವಿಜಯಕ್ಕಾಗಿ ಛತ್ರಪತಿ ಶಿವಾಜಿಗೆ ಕೃತಜ್ಞತೆ ವ್ಯಕ್ತಪಡಿಸಿದ್ದರು. ಶಿವಾಜಿ ತಮ್ಮ ನೆಲದಲ್ಲೇ ಜನ್ಮ ತಳೆದ ಮಹಾತ್ಮ ಎನ್ನುವಂತೆ ಆತನಿಗೆ ಗೌರವ, ಭಕ್ತಿ ಸಮರ್ಪಿಸಿದರು. ಆದರೆ, ನೋವಿನ ಸಂಗತಿ ಎಂದರೆ ಈ ಸಮಯದಲ್ಲಿ ಅಧಿಕಾರದಲ್ಲಿದ್ದ ಕಾಂಗ್ರೆಸ್ ಸರ್ಕಾರ ಈ ವಿಜಯಕ್ಕೆ ಸಂಬಂಧಿಸಿ ಒಂದೇ ಒಂದು ಮಾತನ್ನೂ ಆಡಲಿಲ್ಲ. ಶಿವಾಜಿಯ ಗುಣಗಾನವನ್ನೂ ಮಾಡಲಿಲ್ಲ. ಹೀಗಾಗಿ ಭಾರತೀಯರಿಗೆ ಈ ವಿಚಾರದ ಬಗ್ಗೆ ಮಾಹಿತಿಯೇ ಸಿಗಲಿಲ್ಲ. ಆದರೆ, ಸತ್ಯವನ್ನು ಬಹಳ ದಿನಗಳ ಕಾಲ ಮುಚ್ಚಿಡಲು ಸಾಧ್ಯವಿಲ್ಲ. ಕೊನೆಗೂ ವಿಯೆಟ್ನಾಂ ನಾಯಕರು ಸತ್ಯವನ್ನು ಜಗತ್ತಿನ ಮುಂದೆ ಬಹಿರಂಗಪಡಿಸಿದರು. ಆದರೆ, ಇದರಿಂದ ಅಂದು ಭಾರತದಲ್ಲಿ ಅಧಿಕಾರದಲ್ಲಿದ್ದ ಪಕ್ಷ ಮತ್ತು ಅದರ ನಾಯಕರಿಗೆ ಪಶ್ಚಾತ್ತಾಪ ಆಯಿತೋ ಇಲ್ಲವೋ ಗೊತ್ತಿಲ್ಲ. ಅಂದ ಹಾಗೇ ವಿಯೆಟ್ನಾಂ ವಿಜಯದ ಗುಟ್ಟನ್ನು ರಟ್ಟು ಮಾಡಿದ್ದು ಅಲ್ಲಿನ ಅಂದಿನ ಅಧ್ಯಕ್ಷರು. ಅದೂ ಭಾರತ ಪ್ರವಾಸ ಸಂದರ್ಭದಲ್ಲೇ. ಹೌದು, ಅಮೆರಿಕ ವಿರುದ್ಧದ ವಿಜಯದ ಕುರಿತು ಅವರನ್ನು ಪ್ರಶ್ನಿಸಿದಾಗ ಉತ್ತರದ ರೂಪದಲ್ಲಿ ಅವರು ವಿಜಯ ಕಾರಣಗಳನ್ನು ಉಲ್ಲೇಖಿಸುತ್ತ ಶಿವಾಜಿಯ ಯುದ್ಧತಂತ್ರಗಳನ್ನು ಪ್ರಸ್ತಾಪಿಸಿದ್ದರು. ಅವರ ಪ್ರಕಾರ ಅಮೆರಿಕದಂಥ ಶಕ್ತಿಶಾಲಿ ಹಾಗೂ ಸೈನಿಕ ಬಲವನ್ನು ಹೊಂದಿರುವ ರಾಷ್ಟ್ರವನ್ನು ಸೋಲಿಸುವುದು ಅಷ್ಟು ಸುಲಭದ ಮಾತಾಗಿರಲಿಲ್ಲ. ಆದರೆ, ಯುದ್ಧವನ್ನು ಜಯಿಸಲು ಯಾವೆಲ್ಲ ತಂತ್ರಗಳಿವೆ ಎಂಬ ಬಗ್ಗೆ ವಿಯೆಟ್ನಾಂ ನಾಯಕರು ಇತಿಹಾಸದ ಪುಟಗಳನ್ನು ತಿರುವಿ ಹಾಕಿದಾಗ ಅವರಿಗೆ ಭಾರತದ ಪುಟ್ಟ ರಾಜ್ಯವೊಂದರ ರಾಜನು ಔರಂಗಜೇಬನ್​ನಂಥ ಬಲಿಷ್ಠ ಸಾಮ್ರಾಟನ ವಿರುದ್ಧ ವಿಜಯ ಸಾಧಿಸಿದ ಸಂಗತಿ ಆಸಕ್ತಿ ಮೂಡಿಸಿತು. ಈ ರಾಜನ ಚರಿತ್ರೆ ಹಾಗೂ ಕಾರ್ಯಶೈಲಿಯಿಂದ ಅಲ್ಲಿನ ನಾಯಕರು ಎಷ್ಟು ಪ್ರಭಾವಿತರಾದರು ಎಂದರೆ ಅಮೆರಿಕದ ವಿರುದ್ಧದ ತಮ್ಮ ರಣನೀತಿಯನ್ನೇ ಬದಲಿಸಿದರು. ಆ ರಾಜ ಬೇರಾರೂ ಅಲ್ಲ, ಛತ್ರಪತಿ ಶಿವಾಜಿ. ಔರಂಗಜೇಬ್​ನ ವಿರುದ್ಧ ಶಿವಾಜಿ ಬಹಿರಂಗ ಯುದ್ಧ ಸಾರದೆ ಮರೆಯಲ್ಲಿ ನಿಂತು ಹೋರಾಡುವ ತಂತ್ರ ಅನುಸರಿಸಲು ನಿರ್ಧರಿಸಿದರು. ಔರಂಗಜೇಬ್​ನ ಬಲಿಷ್ಠ ಸೇನೆಯ ವಿರುದ್ಧ ಮರೆಯಲ್ಲಿ ಅವಿತು ಕುಳಿತು ಒಮ್ಮೆಗೆ ದಾಳಿ ಮಾಡುವ ತಂತ್ರವನ್ನು ಅನುಸರಿಸುವ ಮೂಲಕ ಶಿವಾಜಿ ಸೈನಿಕರು ಜಯ ಸಾಧಿಸುತ್ತಿದ್ದರು. ಯಾವ ದಿಕ್ಕಿನಿಂದ, ಎಲ್ಲಿಂದ ದಾಳಿ ನಡೆಯಬಹುದು ಎಂಬ ಸೂಚನೆಯೂ ಮೊಘಲ ಸೈನಿಕರಿಗೆ ಸಿಗುತ್ತಿರಲಿಲ್ಲ. ಒಟ್ಟಾರೆ ಶಿವಾಜಿಯ ಗೆರಿಲ್ಲಾ ಯುದ್ಧತಂತ್ರ ಔರಂಗಜೇಬ್​ನ ಸೇನೆಗೆ ಮಣ್ಣು ಮುಕ್ಕಿಸಿತ್ತು. ವಿಯೆಟ್ನಾಂ ಕೂಡ ಅಮೆರಿಕದ ವಿರುದ್ಧ ಮರೆಯಲ್ಲಿ ನಿಂತು ಯುದ್ಧ ಮಾಡುವ ತಂತ್ರ ಅನುಸರಿಸಿತು. ವಿಯೆಟ್ನಾಂನ ಗೆರಿಲ್ಲಾ ತಂತ್ರಕ್ಕೆ ಮಣಿದು ಅಮೆರಿಕ ಅಲ್ಲಿಂದ ಜಾಗ ಖಾಲಿ ಮಾಡುವುದು ಅನಿವಾರ್ಯವಾಗಿತ್ತು. ಕೆಲವೇ ದಿನಗಳಲ್ಲಿ ವಿಯೆಟ್ನಾಂನ ಬೆರಳೆಣಿಕೆಯಷ್ಟು ಸೈನಿಕರು ಅಮೆರಿಕದ ಬೃಹತ್ ಸೇನಾಪಡೆಗಳನ್ನು ಓಡಿಸಿ ವಿಜಯದ ನಗೆ ಬೀರಿದ್ದರು.

ಶಿವಾಜಿಗೆ ನಮಿಸಿದ ವಿಯೆಟ್ನಾಂ: ಶಿವಾಜಿಯ ಯುದ್ಧತಂತ್ರಗಳು, ಆದರ್ಶಗಳಿಂದ ಪ್ರೇರಣೆ ಸಿಗದೆ ಹೋಗಿದ್ದರೆ ಈ ಜಯ ಸಾಧ್ಯವಾಗುತ್ತಿರಲಿಲ್ಲ. ದೇಶ ಗುಲಾಮಗಿರಿಗೆ ಒಳಗಾಗಬೇಕಿತ್ತು ಎಂಬುದನ್ನು ವಿಯೆಟ್ನಾಂನ ಸೇನಾಧಿಕಾರಿಗಳು ಹಾಗೂ ನಾಯಕರು ಸದಾ ಸ್ಮರಿಸುತ್ತಾರೆ. ವಿಯೆಟ್ನಾಂನ ಜನತೆ ಶಿವಾಜಿಯನ್ನು ಎಷ್ಟು ಆರಾಧಿಸುತ್ತಾರೆ ಎಂಬುದಕ್ಕೆ ಒಂದು ಚಿಕ್ಕ ನಿದರ್ಶನ. ಅಮೆರಿಕದ ವಿರುದ್ಧ ಹೋರಾಟದ ನೇತೃತ್ವ ವಹಿಸಿದ್ದ ಅಲ್ಲಿನ ಅಂದಿನ ಅಧ್ಯಕ್ಷರು ನಿಧನರಾದಾಗ ಅವರ ಸಮಾಧಿ ಮೇಲೆ ಒಂದು ವಾಕ್ಯ ಬರೆಯಲಾಗಿತ್ತು: ‘ವಿಯೆಟ್ನಾಂ ಅಮೆರಿಕದ ವಿರುದ್ಧ ದಾಖಲಿಸಿದ ವಿಜಯದ ಶ್ರೇಯಸ್ಸು ಯಾರಿಗಾದರೂ ಸಲ್ಲುವುದಾದರೆ ಅದು ಛತ್ರಪತಿ ಶಿವಾಜಿ ಮಹಾರಾಜನಿಗೆ ಮಾತ್ರ. ಆತನ ಅನುಯಾಯಿಯ ರೂಪದಲ್ಲಿ ನಾನು ಸೇನೆಯ ನೇತೃತ್ವ ವಹಿಸಿದ್ದೆ ಅಷ್ಟೆ’. ಅಂದಿನ ರಾಷ್ಟ್ರಪತಿಗಳು ವಿಜಯ ಸಿಕ್ಕ ಬಳಿಕ ಶಿವಾಜಿ ಕುರಿತು ಒಂದು ಮಾತು ಆಡಿದ್ದರು: ‘ ನಮ್ಮ ದೇಶದಲ್ಲಿ ಶಿವಾಜಿಯಂತಹ ಒಬ್ಬ ನಾಯಕನಿದ್ದಿದ್ದರೆ ನಾವು ಇಡೀ ವಿಶ್ವವನ್ನೇ ಆಳುತ್ತಿದ್ದೆವು’.

ಅಮೆರಿಕದ ವಿರುದ್ಧ ಐತಿಹಾಸಿಕ ಗೆಲುವು ಸಿಕ್ಕ ಕೆಲವು ದಿನಗಳ ಬಳಿಕ ವಿಯೆಟ್ನಾಂನ ವಿದೇಶಾಂಗ ಸಚಿವೆ ಭಾರತಕ್ಕೆ ಭೇಟಿ ನೀಡಿದ್ದರು. ಆಕೆ ಮಹಾತ್ಮ ಗಾಂಧೀಜಿ ಅವರ ಸಮಾಧಿ ಹಾಗೂ ಕೆಂಪುಕೋಟೆಗೆ ಭೇಟಿ ನೀಡಿದ್ದರು. ಆ ಸಮಯದಲ್ಲಿ ಅವರು ‘ಛತ್ರಪತಿ ಶಿವಾಜಿ ಸಮಾಧಿ ಎಲ್ಲಿದೆ?’ ಎಂದು ಪ್ರಶ್ನಿಸಿದರು. ಆಗ ಅಲ್ಲಿ ಉಪಸ್ಥಿತರಿದ್ದ ಅಧಿಕಾರಿಯೊಬ್ಬರು ಶಿವಾಜಿ ಸಮಾಧಿ ಇಲ್ಲಿಂದ ಬಹುದೂರದಲ್ಲಿರುವ ಮಹಾರಾಷ್ಟ್ರದ ರಾಯಗಢ ಜಿಲ್ಲೆಯಲ್ಲಿದೆ ಎಂದು ಉತ್ತರಿಸಿದ್ದರು. ವಿಯೆಟ್ನಾಂನ ಸಚಿವೆ ಆ ಜಾಗಕ್ಕೆ ಭೇಟಿ ನೀಡಬೇಕೆಂಬ ಅಭಿಲಾಷೆ ವ್ಯಕ್ತಪಡಿಸಿದರು. ಅಷ್ಟೇ ಅಲ್ಲ, ಅಲ್ಲಿಗೆ ಭೇಟಿ ನೀಡಿದರು ಕೂಡ. ಶಿವಾಜಿಯ ಸಮಾಧಿಗೆ ನಮಿಸಿದ ಬಳಿಕ ಒಮ್ಮೆ ದೀರ್ಘವಾಗಿ ಉಸಿರೆಳೆದುಕೊಂಡು ಆ ಸಚಿವೆ ಹೇಳಿದ ಒಂದೇ ಒಂದು ವಾಕ್ಯ-‘ಶಿವಾಜಿ ನಮ್ಮ ದೇಶದಲ್ಲಿ ಹುಟ್ಟಿದ್ದರೆ!’ ಆ ಬಳಿಕ ಸಮಾಧಿ ಬಳಿಯಿಂದ ಒಂದು ಹಿಡಿ ಮಣ್ಣನ್ನು ತೆಗೆದುಕೊಂಡು ಅದನ್ನು ಹಣೆಗೆ ಹಚ್ಚಿಕೊಂಡರು. ಅದರಲ್ಲಿ ಸ್ವಲ್ಪ ಭಾಗವನ್ನು ಪರ್ಸ್​ನಲ್ಲಿ ಜೋಪಾನವಾಗಿ ತೆಗೆದಿಟ್ಟ ಆಕೆ ಹೇಳಿದ್ದು ಇಷ್ಟು: ‘‘ಈ ಮಣ್ಣನ್ನು ನನ್ನ ದೇಶದ ಮಣ್ಣಿನಲ್ಲಿ ಬೆರೆಸಿದ ಬಳಿಕ ಭಗವಾನ್ ಬುದ್ಧನಲ್ಲಿ ಪ್ರಾರ್ಥಿಸುವುದಿಷ್ಟೇ ‘ಶಿವಾಜಿ ಮಹಾರಾಜ್ ವಿಯೆಟ್ನಾಂನಲ್ಲಿ ಮರುಜನ್ಮ ತಾಳಲಿ. ಆ ಮೂಲಕ ನನ್ನ ದೇಶ ಇನ್ನೊಮ್ಮೆ ಗುಲಾಮಗಿರಿಗೆ ಗುರಿಯಾಗದಂತೆ ಕಾಪಾಡಲಿ’. ವಿಯೆಟ್ನಾಂ ಜನತೆ ಶಿವಾಜಿಯ ಕುರಿತು ತೋರುತ್ತಿರುವ ಆದರ, ಗೌರವ ಅಪಾರ. ಆದರೆ ಭಾರತೀಯರಾದ ನಾವು ಶಿವಾಜಿ ಬಗ್ಗೆ ಎಷ್ಟು ತಿಳಿದುಕೊಂಡಿದ್ದೇವೆ?

-ಮೂಜಫರ ಹುಸೇನ್ 

(ಲೇಖಕರು ರಾಷ್ಟ್ರೀಯ ಉರ್ದು ವಿಕಾಸ ಪರಿಷದ್​ನ ಉಪಾಧ್ಯಕ್ಷರು ಮಧ್ಯಪ್ರಾಚ್ಯ, ಪಾಕಿಸ್ತಾನ ವಿದ್ಯಮಾನಗಳ ನುರಿತ ವಿಶ್ಲೇಷಕರು, ಪದ್ಮಶ್ರೀ ಪ್ರಶಸ್ತಿ ಪುರಸ್ಕೃತ ಖ್ಯಾತ ಬರಹಗಾರರು)

Comments