UK Suddi
The news is by your side.

ಟೈಟಾನಿಕ್‌ ಹಡಗು ದುರಂತ ಸಂಭವಿಸಿ ಇಂದಿಗೆ 107 ವರ್ಷ.

ಈ ದುರಂತ ಮತ್ತು ಟೈಟಾನಿಕ್‌ ಹಡಗಿನ ಕುರಿತಾದ ಹೆಚ್ಚಿನ ವಿವರ ಇಲ್ಲಿದೆ.

ಘಟನೆ ವಿವರ: ಬ್ರಿಟನ್‌ನ ಐಷಾರಾಮಿ ಪ್ರಯಾಣಿಕ ಹಡಗು ಟೈಟಾನಿಕ್‌ ತನ್ನ ಮೊದಲ ಪ್ರಯಾಣದಲ್ಲಿ ಐಸ್‌ಬರ್ಗ್‌ (ಹಿಮಬಂಡೆ)ಗೆ ಬಡಿದು ಮುಳುಗಿತ್ತು. ಏಪ್ರಿಲ್‌ 15ರಂದು ಇಂಗ್ಲೆಂಡ್‌ನಿಂದ ಅಮೆರಿಕಕ್ಕೆ ಮೊದಲ ಪ್ರಯಾಣ ಬೆಳೆಸಿದ ಸಂದರ್ಭದಲ್ಲಿ ಈ ಘಟನೆ ನಡೆಯಿತು. ಆ ಸಂದರ್ಭದಲ್ಲಿ ಹಡಗಿನಲ್ಲಿ ಸುಮಾರು 2207 ಮಂದಿ ಪ್ರಯಾಣಿಕರು ಇದ್ದರು. ಸುಮಾರು 1500 ಮಂದಿ ಮೃತಪಟ್ಟರು. ಮಿಲ್ವಿನಾ ಡೀನ್‌ ಎಂಬಾಕೆ ದುರಂತದಲ್ಲಿ ಬದುಕುಳಿದ ಕೊನೆಯವರು. ಇವರು 2009ರ ಮೇ 31ರಂದು ಮೃತಪಟ್ಟರು. ಟೈಟಾನಿಕ್‌ ದುರಂತ ಸಂಭವಿಸಿದಾಗ ಅವರು ಕೇವಲ 2 ತಿಂಗಳ ಮಗು.

ಐಸ್‌ಬರ್ಗ್‌ ಎಂದರೇನು?

ಟೈಟಾನಿಕ್‌ ದುರಂತಕ್ಕೆ ಕಾರಣವಾಗಿರುವುದು ಹಿಮಬಂಡೆ ಅಥವಾ ಐಸ್‌ಬರ್ಗ್‌. ಸಮುದ್ರದಲ್ಲಿ ತೇಲಿಬರುವ ಬೃಹತ್‌ ಗಾತ್ರದ ಮಂಜುಗಡ್ಡೆಗಳು ಇವಾಗಿವೆ. ಇವುಗಳಿಗೆ ನೀರ್ಗಲ್ಲುಗಳೆಂದೂ ಕರೆಯುತ್ತಾರೆ. ಹಿಮನದಿಗಳು ಅಥವಾ ಧ್ರುವಪ್ರದೇಶಗಳಿಂದಲೂ ಇವು ತೇಲಿಬರುತ್ತವೆ. ನೀರಿನಲ್ಲಿ ಇವುಗಳ ಯಾವುದಾದರೂ ಒಂದು ಭಾಗ ಅಥವಾ ತುದಿ ಮಾತ್ರ ಸ್ವಲ್ಪ ಕಾಣಿಸುತ್ತದೆ. ನೀರಿನಾಳದಲ್ಲಿ ಇವು ಬೃಹತ್‌ ಗಾತ್ರವನ್ನು ಹೊಂದಿರಬಹುದು.

ಟೈಟಾನಿಕ್‌ ವಿಶೇಷಗಳು:

ಟೈಟಾನಿಕ್‌ ಅನ್ನು ಮುಳುಗಲಾರದ ಹಡಗು ಎಂದು ಕರೆಯಲಾಗಿತ್ತು. ಇಷ್ಟು ಭರ್ಜರಿಯಾಗಿದ್ದ ಹಡಗು ಮುಳುಗಲು ಸಾಧ್ಯವೇ ಇಲ್ಲ ಎನ್ನುವ ಭಾವನೆ ಎಲ್ಲರಲ್ಲಿತ್ತು. ಆದರೆ, ನೀರ್ಗಲ್ಲಿಗೆ ಡಿಕ್ಕಿ ಹೊಡೆದು ಈ ಹಡಗು ಮುಳುಗಿತ್ತು.

ಈ ನೈಜ ಘಟನೆಯನ್ನೇ ಆಧಾರವಾಗಿಟ್ಟುಕೊಂಡು ಹಾಲಿವುಡ್‌ನ ಪ್ರಸಿದ್ಧ ನಿರ್ದೇಶಕ ಜೇಮ್ಸ್‌ ಕ್ಯಾಮರಾನ್‌ 1997ರಲ್ಲಿ ಟೈಟಾನಿಕ್‌ ಎಂಬ ಚಲನಚಿತ್ರ ರಚಿಸಿದ್ದರು.

*ಟೈಟಾನಿಕ್‌ ಗಾತ್ರ ಸಾಮಾನ್ಯ ಪುಟ್ಬಾಲ್‌ ಮೈದಾನಕ್ಕಿಂತ ಮೂರುಪಟ್ಟು ಹೆಚ್ಚಾಗಿತ್ತು.

*ಟೈಟಾನಿಕ್‌ ಎಂಜಿನಿಗಾಗಿ ಪ್ರತಿದಿನ 800 ಟನ್‌ ಕಲ್ಲಿದ್ದಲು ಬಳಕೆ ಮಾಡಲಾಗುತ್ತಿತ್ತು.

*ಈ ಹಡಗು ಗಂಟೆಗೆ 43.50 ಕಿ.ಮಿ. ವೇಗದಲ್ಲಿ ಸಂಚರಿಸುವ ಸಾಮರ್ಥ್ಯ‌ ಹೊಂದಿತ್ತು.

*ಈ ಹಡಗಿನಲ್ಲಿ 4 ಎಲಿವೇಟರ್‌, ಒಂದು ಬಿಸಿನೀರಿನ ಈಜುಕೊಳ, ಜಿಮ್‌, ಎರಡು ಲೈಬ್ರೆರಿ ಮತ್ತು 2 ಸಲೂನ್‌ಗಳಿದ್ದವು.

*ಟೈಟಾನಿಕ್‌ ಹಡಗು 3,547 ಪ್ರಯಾಣಿಕರು ಪ್ರಯಾಣಿಸುವ ಸಾಮರ್ಥ್ಯ‌ ಹೊಂದಿದೆ. ಮೊದಲ ಪ್ರಯಾಣದಲ್ಲಿ 2,200 ಪ್ರಯಾಣಿಕರು ಸಂಚರಿಸಿದ್ದರು.

Comments